Jan 25, 2012

واحد صاحبى



معرفش ازاى؟
هقابلك بكره
مش قادر اتخيل
تفاصيل المشهد الميلودرامى
وانت بتسجد ركعة لله
وبتاخد من روحى حبة من الماضى
الفاضل فيا
وتصب فى قلبك
مش هقولك فاكر
ايام مافضلنا نسرح فى حوارى
نجرى فى شوارع
نتعرف على الدنيا
الدنيا اللى اول ما صاحبناها
رميتنا بعيد  عن بعض
نتشعلق فى الايام ونحاول ننسى
ياااااه فاكر تسريحة شعرك , خناقاتك الشهرية مع الحلاق
ياااااه فاكر شعرى المتنحكش 
وتشيرتى المنتوش من مسمار باب بيتكم 
فاكر بنت جيرانك
كام قصة حب وفشلت
كام عيل صاحب
داب مننا فى امتحانات كشف البشر

اه  معلش نسيت 
احدفلك اخر ملحوظة 
ياصاحبى 
ملامحى مابتتغيرش
غير لو قررت انك تتغير