لمّا تستلمى شهادة وفاتى
زغرطى
ماتعيطيش..
ماتبلّيهاش بـالدموع
إعملى زيىّ تمام
إهتفى وسط الميدان
سمّعيهم
يـا امّه صوتى
خلى اُمة مصر تشهد
إن موتى
يوم بنشهد
فيه ميلاد مليون بطل
بيعيْد هتاف هز عرش
الدكتاتور
,,,
زغرطى
يـا امّه يمكن!!
يعرفوا
إن الشهيد على نعشه
عايش
روحه بتلف الشوارع
على راس مسيرة
ضد حكم العسكريّة
أعلى من صوت الرصاص
رايته بيضه
راية تهزم بندقية
صوت إمام بيصلى
خلفه مليونية
,,,
زغرطى يا امّه
بغنوة تهدّ سور الحزن
فينا
وتبنى سور للكرامة الإنسانية
,,,
لمّا تستلمى شهادة وفاتى
إبعتيها
للى حاكم
فى المحاكم
والنيابة
والمشير فى العباسية
ابعتيها لإعتصامى فـ
الصينية
إمضى يا امّه بنفس حُـرّة
ع الشهادة بين قوسين
( ثورتى مابتنتهيش
ثورتى لازم تعيش
ثورتى دى مستمرة)
,,,
لمّا تستلمى شهادة وفاتى
ضميها على صدرك
يا أمي أصلها شهادة
ميلادى
