انا اسف لو شايف فى ملامحى حبة تغيبر ، وكمان صوتى ، مهو ايامنا بتجرى وعدى كتير ، بتقول ايه ! عقلى ! والله ما فاكر راح فين ، تقريبا اخر ايامنا كانت كلها خناقات ، قلبى !!! مش زى زمان خطواته كلها نهجان ، حتى اصحابى ، اصحابى اللى بصمنا مع الدنيا نفس الفيش والتشبيه ، لاوكمان من كتر الشبه الواصل بينا كانت بطايقنا كلها واحده ، ياااااه حتى اصحابى فى الدنيا بقوا زى التايهين , اللى اتسرسب وسط الايام واللى ملوش عنوان ، بتقول ايه ، احنا كبرنا ، ايوه كبرنا ، بس الاعمار بيد الله ، واللى اتعاش مش هنعيده ، ولو اتجمعنا يبقى بصدفة ، يا هنتقابل 100 % عضم فى قفة ، ياااااااه اسف اصل نسيت ارحب بيك شايك إيه ؟ , اوعى تكون بتحب المر وبتشربه سادة زى حلاتى !! ، ليه مبتردش ، من اول ماوصلت وانت بتسمع !!!!
!!!! بتقول ايه انت ملاك الموت يعنى خلاص هتقبض روحى طب تسمحلى هدخل ابوس على خد الاحلام الضايعة وارجعلك مش ندمان
#تعب_الرحلة
#العمر_بيجرى
#الرضا
مقتطفات من شعر ميسرة صلاح الدين
ـــــــــــــــــــــــــــــــــــــــــــــــــــــ
ــــــــــ1ــــــــ ربيع أول=========
خروج الكلمة من قلبي على لسانك
ربيع أول
خروج الكلمة من قلبك على لساني
ربيع تانى
خروج الكلمة ع العالم
شموع بتحنى ضفايرها
مظاهر صعب تأويلها
خطوط بيضة وخطوط سودة
مكاحل عشق مفقودة
وبين الخرجة والعودة
مساحة كبيرة للتفكير
ـــــــــــــــ2ــــــــــــــ
تتصور
=========
تتصور..... أنامتصورتش من مدة
علشان النظرة اللى في صورتى مبتريحنيش
تتصور.... أنامتكلمتش من مدة
علشان النبرة اللى في صوتى مبتطمنيش
وأنا زى مفيش رافض نفسه
متحامل جداً على نفسه
بيخاف ليجيله اللى في نفسه وبيخاف ميجيش
ـــــــــــــــ3ـــــــــــــــ
اوضة ضلمة
=========
بهدوء شديد..
فتَحِتْ الباب الخشب..واتسحبِتْ
الأوضه كانت ضلمه كحل
وانا كنت اغمق ركن ف الضلمة
رغم المهدئ..بارتعش تفكير
الأوضه كانت ضلمه كحل
اشباح كتير م الماضي نهشتْ عزلتى
فطفيت سيجارة ف كفي
وقلبت السرير
الأوضه كانت ضلمه كحل
أوقات كتيرة شجاعتى بتخونني..
مش قادر اقطع حتى شريانى الأخير
بهدوء شديد..
فتحتْ الباب الخشب.. واتسحّبتْ
ما بقيتش عارف
॥هاعمل ايه ؟ ؟
ــــــــــــــ4ــــــــــــــ
العسلية
========
من صغرى بحب العسلية
واكمن عيونك عسلية
أنا حبيتك
على باب بيتك
واقف ومسمر رجليه
ونن عنيه
قصقص جناحاتة
فى شباكك
عصفور
و أتمحك فشباكك
مش عايز
حد يطلعني
إنما لو قلبك
يوم باعني
أنا حكبر
على كل مشاعري
وحبطل أكل العسلية
ــــــــــــــــ5ــــــــــــــ
تتر النهاية
=========
مكنتش فيكى المشكلة
ولا فى الظروف الصعبة
ولا طيش الشباب
المشكلة فيه أنا
أنا والنهايات السعيدة مش صحاب
ـــــــــــــــــــــــــــــــــــــ
عندما اخترت تلك الابيات من اشعار ميسرة صلاح تذكرت حديثى معه منذ شهور وانا اقتطف له بعض من ابياته ووجدته قد تأثر بها كما لو كان أحدا غيره قد كتبها له
اقتطفها ... احمد البوهي
