أحمد العايدى

الفقرة اليتيمة

لما تبقى انتَ

الفقرة اليتيمة

في حياتك

وانت جمهورك

تقدر تروًح بدرى

تعمل سندوتشات

جبنة, وتف

بزر الزتون

في الزبالة

أم كيس بيشر م الجمب

تابع مسلسل هيرو

وهات روتانا

وعلى قد ما تقدر

ادايق م الإعلانات

اعمل تليفونات

بصبص للبنات

اللى في البانر الفوقانى

شيًك على مين ضافك

فى الفيس بوك

_ لو مُزة ضيفه_

إلعب فى الإستيتس

تحت اسمك

شوف مين من صحابك

مصاحب مين؟

و مين حاطك

في الليمتد بروفايل

نفسن

خربش دقنك

وانت بتهرش

قوم علًق ع الشاى

أو القهوة
خدلك بق ميه

ومتنساش تلف

الغطا ع القزازة

عكس اتجاه الفتح

بالجامد

اخطف عنب, بطيخ

شخلع موبايلك النوكيا

المعفن

والعب فى التاريخ

واى حد بطل يتصل

بيك من شهر

دلته

فرفت الحشيش

ع التبغ بضمير

ولو حتعزم

زود للزبون  التبغ

بغباء

معلش

اللى متعود ع الفقرة

اليتيمة فى حياته

وهو جمهوره

الوحيد

يقدر ميرُحش الشغل

أصلا

****
الكاتب الجميل

أحمد العايدى 

من ديوان العشق السادى _ أشعار بالعامية المصرية

دار ميريت 2009

امتحان في حروف العطف

بالرغم من انك حافظ

كل الإجابات

ومذاكر المنهج من الجلدة للجلدة

ومراجع اكتر من مرة

مش قادر توصل لإجابة

على اى سؤال

ولا حتى

مجمع حرفين على بعض

مش نافعة حبوب الثقة

اللي بتبلعها في الأوقات الصعبة

متوتر جدا

من أول لحظة

بتشوف فيها الورقة

قلمك رن على الأرض

وزادت رعشة جسمك

بيبتسم لك المراقب

وهو بيناولهولك

قال وبكل برود

اطمن

الامتحان سهل جدا

كالعادة

وأنت

مع كل دقيقة بتعدي

بتشر عرق

غرقت زمايلك في اللجنة

والدكك بتعوم حواليك كمراكب

بعد ما فشلت مناديل فلورا

في تنشيفك

عملولك على وجه السرعة

وبحكمة

لجنة خاصة

جمعوا بعض وبأيد واحدة

طبطبوا على ضهرك بالراحة

وقتها

قررت ما تهداش

دخلت في نوبة صرع وخرجت

أثنائها

اتصلوا بعيلتك

جت أمك لطمت خديها

جه أبوك ملياه النية

بتخويفك

هيقولك جاوب هتجاوب

لكن شافك قدامه صعبت عليه

ركن رأسه جنبك

وبدأ يبكى معاك

تقريبا صورتك موجودة دلوقتى

ع الصفحة الأولى

في كل الجرانيين الهبلة

وببنط عريض

والخبر أتذاع في النشرة

والناس بتصدق

انك أخر ضحايا

امتحانات الثانوية العامة

ومحدش عارف انك

كنت بتمتحن

أد إيه..؟؟ الناس اللي حواليك

طيبين جدا

من صفر لخمسة

0

وكأنِك روح طيبه بعتهالى ربنا

من السماء

و ديما بتأمل علامات ظهورك

و اختفائِك

بشوفك كالعادرة

مريم......... بتول

وبستريح في جنتك

لما بتنطقى كالبشر .

1

البنت اللي واقفة

ع الرصيف

بتجمع نمر أتوبيس الهيئة

وبتقسمهم ÷

على عدد دقايق

انتظارها

بتطلع بنتيجة واحده

هي

مالا نهاية( ∞ )

2

الولد ما بيوصلش في معاده

بيفوت كل التاكسيات

وواخدها جرى بنهجان

بيقرر فجأة يرجع في كلامه

ويبطل يحلم

3

المساحة اللي بتجمع مشهد

البنت والولد

بتساع كتير للمتفرجين

لكن مخنوقة بالفعل

4

المخرج مش مصدق السيناريو ولا الحوار

و مكدب الممثلين

وبيعيد المشهد ب اتنين كومبارس

فى دماغه مصدق قدرته على تحريكهم

5

في كل لحظة بتعدى

لقطه وتفاصيل

ممنوعة من العرض

لظروف خارجة عن إرادتي

نثر

لما قلتلى انك بتحب الشعر

بسبب القرآن

استنتجت أن الأنبياء

مش نهاية توصيل كلام ربنا

كل قصايد الشعر الموزون

القافية

السجع

التفعيلة

 وحاضنهم علم العروض

متجمعين هناك

وفى حالة استغراب!

ليه؟ ما أنكتبناش

نثر

النثر بيملا  الروايات

والروايات بتملا  الدنيا حياة

والدنيا قصيدة نثر طويلة

مش مكتوبة في أي حكاية

وده مش عيب

أما

أنا

حرف

في

كلمة

ساكنة

جوه

قصيدة

في

قلب

شاعر

لسه

ما انولدش

وانتى

بنت بكر

لفكرة

بتغير 
فى

العالم

بهدوء

مقدرتش اتوب

غصب عنى

لقيتى بحن لذنب قديم

للغلط

للكاس

لسجارة الحشيش

النوم فى حضن مومس

عملية نصب

غصب عنى يا رب

حاولت اتوب

وما اقدرتش

ابطل اخون اصحابى

او حتى اكون واحد صادق

مع نفسه لمرة

انا عارف ان

بخالف كل وعودى

وارجع اطلب منك وقفة

تسند بيها روحى الغارقة

فى بحر التيه

على وعد ان ارجع ابكى بحرقة

اتوضى

انزل ساعة سجود

وحساب فى النفس ولوم

فاعود

ويا الشيطان الساكن فيا

اسرق

اقتل

اهبش جثث الاموات

واحج سبع اشواط معصية

و يا دوب

غصب عنى يا رب

مقدرتش اتوب

عيدية

0

الكحك اللى فى الشهادة

غير كحك العيد

الاول بياخر سنة

والتانى بيجى كل سنة

1

مش ممكن أرجع تانى اعيد

تفاصيل العيد

وأبات وفى حضنى الجزمة بتلمع

والبدلة الجينز

وحبة أحلام للصبح يفتح

ألقى حنان بنت جيرانا

مستنية خروجة لحد المراجيح

ومسكة أيد

وبوسة بريئة

ما بتخدش حيائها

بطعم التفاريح

مش ممكن أرجع تانى اعيد

تفاصيل العيد

ويا عيال حتتنا

نتسابق

على تأجير العجل المتزوق

وكمان فرقعة البومب

حرب العصابات

بمسدس مية

ركوب الحنطور

اللى بيحدف لجنينة بعيد

مش ممكن أرجع تانى اعيد

تفاصيل العيد

وياخدنى اخويا الاكبر منى

لسيما بيجال

ونشوف الفلم العربى

ونرجع عالعصر عشان

الفلم الهندى على التانية

للنجم اميتابتشان

مش ممكن ارجع تانى اعيد

تفاصيل العيد

واستمتع باللمة الحلوة مع العيلة

ونقول حكايات

ووشوش الناس اللى بتضحك

وبتدى عيدية

و اللغبطة اكتر من مرة فى عد الجنيهات

ممكن نرجع تانى نعيد

ونرتب لخروجة انا وانت يا صاحبى

نتمشى عالكورنيش

نتسابق فيها على طلوع الهرم الاكبر

ولحظة مع بعضينا نعيش

وبكاميرتنا

نخلد صورة

يمكن نقدر بيها نعيد

ايام بتعدى وبتروح

ل

ب

ع

ي

د

أحلام قديمة

ليه بننسى نرسم أحلامنا ونعيش فى الوهم سنين؟

بنلوم ديما أيامنا نتعذب بين شوق وحنين

بنسافر جوه الحكايات لكن لسانا واقفين

لاقدرنا نتحرك خطوة ولاعرفنا هنوصل على فين

وبنكدب قدام مرايتنا ونقول اه عايشيين

جوانا الصمت بيعشقنا وبنعشق والعشق لمين؟

للخوف الموجود حوالينا! والقهر القاتل أفكارنا!

والحقد الساكن فى قلوبنا !واللهى أحنا ما عارفين!

ليه بننسى نرسم أحلامنا ونعيش فى الوهم سنين؟

وبناخد من الدنيا ظاهرها ونسيب الباطن د لمين

والحق ان كان هو ظاهرها بنكون له مش شايفيين

غمينا عيونا بأدينا وبنقيد فى النار من حوالينا

عارفين سكتنا وبنفوتها والجهل معجز خطاوينا

لو جتنا فكرة نموتها نايمين فى عسلنا ولا صحينا

بنتعلق بحبال مقطوعة وبنحلم بحاجات ممنوعة.

من 2006

وردة صمود

أزرع على خد الزمن وردة صمود

أعزف على عود الأمل لحن الوعود

رشرش الحلم اللى طالع للوجود

أكيد طريقه يوصلك أرض الخلود

أكيد فى يوم راح تترسم أجمل معانى بتنتظرها عنيك

منك أليك

فى ألف خطوة انتصار ويا أنكسار

أتحدى طعم الخوف

طلع سلاحك واشهره

هتعدى طبعا بالأمل

خليك عفى

أصرخ على شط الامانى

أصبر وحدد موقفك

أياك تنخ

أو يختفى صوت الشجاعة

والقناعة هى أنك تنتهى زى البداية

حلمك ما بين أيدك حقيقة مش سراب

ع ا د ى

بصيت على روحى

لقيتنى وحيد

ملقتش الماضى
ولا الحاضر

لقيتنى بعييييد

فوقفت

شهقت


وبدات

عادى جداا

من جديد

نهار رمضان

في وسط الزنقة
وأنا بتمشى
طلعت قلبى
فرقته
فتافيت
على ركاب أتوبيس
الهيئة
بدل العسلية
في عز صيام
الروح
عن حب
الشهوة
لقيتني
بسمع فتوى
بتقولي يجوز
إن كانت النية
فعل الخير