كارت دعوة إختيارى
للموت
قرارك بالرفض
بيخلق حواليك ملايكة
تأيدك
وإديها على إيدك
فى رص
السور النهائى والأخير
بينك وبين
النهايات الحزينة
رفضك
معناه دخولك فى طريق
مليان بشر روحها شفافة
كما روحك
ماتشوفش فيها غير الايمان والصبر
السرطان
كارت دعوة
سريع للموت
إستسلامك
وصمتك
بيسلمك بسهولة
للألم
للقسوة
لنظرات الشفقة اللى بتدبح
لليل ملوش أخر
بيسلمك بسهولة
لبشر هتعيش طول عمرها تأرخ حياتك
بان الراحل
مات بالمرض , أعوذ بالله الخبيث
السرطان
كائن وحيد حى
بيعيش حوالينا
متسق مع ذاته
رسالته واضحة
ومابيهزرش
الناس بتخاف منه
بتخاف تجيب سيرته
وبتستعيذ منه كما الشيطان
