كسر صيام

الواد اللى صام لحد الضهر
وأخوه لغاية العصرية
مفيش حد منهم
خسران دينه

أبوه اللى صلى الفجر حاضر
وبعد السحور كان مطمن
على بطنهم
وفى أيده

كوباية
الميه

أمهم
اللى ملبوخة
فى تظبيط
ملح
الملوخية
وسكر البسبوسة

حتى سيده
حتى سته
وابن عمه وابن خاله

عيلة كاملة

متجمعين
بعد صوت مدفع فى ساعة
المغربية

بيفطروا


فى لمة واحده

وعلى نفس

الطبلية......

********************

صفحات كتب

المدرسة

على شكل عرايس

قصاقيص القماش القديمة

حبة نشا

وبحبل خيط

متلزقين

على فرع زينة

رابط

كل بيوت الشارع

بيت بيت

*************************

وكمان سامع

حديث الروح

صوت الشعراوى

التواشيح

تلاوة القرآن

طالعه من قلب الراديو

النايم

فى حضن فانوس

على هيئة جامع

***************

كحكة بعجوة

بسكوت

تمرتين

قرص

بالسمنة البلدى

الميتين رحمة ع

هما

كسر صيام

فى صبح العيد

*******************

يحيى قدري ..

نادره

يحيى قدرى صدر له ديوان نيجاتيف مطلع العام 2009

4

واصل وليك شوقة من كل معارفها

من غربتك عننا دقنا الضنا لدهور

حنينا ليك يا ولد الدمعة تكشفها

احضن تراب ارضها اكيد هتعرفها

السيد العديسى

صور قديمة





كل التعليقات..
اللي بتصاحب خروج الروح
الوَحشه...
اللي ف عيون الحريم
نهيج جزمتك...
وانت بتحاول تسبق الخشبه
وحتى رعشة إيد المغِسل
وهى بتطفي النور
كل دي صور قديمه
بتلونك وانت ماسك البرواز
بشويش إيديك
تتمطع ع الشرخ
القاسم قزازه
وحاضن يا دوبك...
ربع غبار المحيط
لا الميه البيضه كانت حاجز
بين نظرته وجلدك
ولا سكوته فك خيوط صورتك
من أول رجلك ما داقت الأسفلت
وانت بتُبدر فيك قرار
كان نفسك ساعتها
تفضح عيونه المتعلَّقه ف ضهرك
تشدك قساوة البرواز
الملامح الجامدة...
العبايه اللي بهتت
تكشيرة العِمّه
وقفته قدام الكاميرا
وحاجات كتير بتخلي بدنك يقشعر
من غير لزوم
كانت إيديه بتطول رقبتك
حتى فوق صدر البنات
على طول وشك
بيجري ع الكرباج
والركن المزنوق
بين الجدار والدكه
إحساسك بالقهر..
لحظة ما بتوقع عينيك ع الأرض
ودموعك نازله..
بتغسل عرق السفر
تتفاجئ بالسكون القديم
اللي حابسه العنكبوت
فترجّع البرواز
على نفس المسمار اللي صَدَّى
تطَلّع آخر سيجارة "مارلبورو"
تأجل توليعها
وتْدَوَّر في دماغك
يا ترى..
لسه حافظ معالم السكه
**********************

من ديوان قبلى النجع السيد العديسى
الهيئة العامة لقصور الثقافة
العدد 216

احتمال للإعادة

فى احتمال

إعادة تلات مشاهد من حياتك

مشهد الولادة مع أول صرخت واء

ومشهد ليلة الدخلة

ومشهد الموت

مفيهوش اى احتمال

للإعادة

إلا لو نجيت منه

مبروك عليك

كل يوم بتنولد من جديد

ساعة تكرار ليلة الدخلة

ريحت العرق

ما تفكريش
أن ريحت العرق
هتبعدنى عنك

ياااااااااه ع اللى بيا

دا أنا كل مرة
بتمني
أكون ريكسونا
وأنت بتحضنيها
تحت باطك
لحظة من ارتباطك
بالحياة
النرجسية






و ما تخافيش

الحب من غير
عرق
ميقدرش يعيش

بطريقته الطبيعية

صورة القسيس

مكنتش بصدق العيال

اللى لابسين بناطيل جينز

وكاوتش بينور

وبيعاكسو البنات على ناصية الشارع

مكنتش بصدق

البنات اللى حاشيين

سنتيانتهم قطن

يكبروا صدورهم

عشان يسبقوا سنهم

********

مكنتش بصدق

سبارس السجاير

أنها تعمل دماغ

الشلن الفضة

اللى ما بيجبش غير باكو لبان

الحكايات اللى عملها الشاطر حسن

أو حتى الناس الكبار

********

مكنتش بخاف من أمنا الغولة

الضلمة... نونوات القطط بالليل

الكلب اللى بيهوهو

صورة القسيس على الحيطة

عند أم كريستين.....

أنى ااقول لكريستين ...بحبك

تقولى أحنا صغيرين

*******

لكن كان بيخوفنى

أن اصحي الصبح ملاقيش

جنبي امى واخواتى الاتنين

الجذمة البني شرابي الكروهات

مريلة المدرسة أغنية قمرين

اللي سجلتها ع الكاسيت

كراسة الرسم

و

حل مسألة القسمة المطولة

أرقام الحساب

الضرب

*********

صديق

كان في صديق
بيلم منى
ضحكتى
المتبعترة
عالطريق

كان فى حكاوى
ودنيا فاتحة حضنها
بضمنا

كان في هنا
حبة حاجات
بتشدنا

كان فى اسامى
وذكريات
وبت ساكنة
جنبنا

بت الجيران
لما ابتدينا
نحبها
هو وانا
مكانش فى بينا
اختلاف

كان فى صديق

مرة

مع ان بكاكِ
خوفنى عليكِ



لكن خلانى
اتاكد
مرة اخيرة
انكِ عايزانى