الفقرة اليتيمة
لما تبقى انتَ
الفقرة اليتيمة
في حياتك
وانت جمهورك
تقدر تروًح بدرى
تعمل سندوتشات
جبنة, وتف
بزر الزتون
في الزبالة
أم كيس بيشر م الجمب
تابع مسلسل هيرو
وهات روتانا
وعلى قد ما تقدر
ادايق م الإعلانات
اعمل تليفونات
بصبص للبنات
اللى في البانر الفوقانى
شيًك على مين ضافك
فى الفيس بوك
_ لو مُزة ضيفه_
إلعب فى الإستيتس
تحت اسمك
شوف مين من صحابك
مصاحب مين؟
و مين حاطك
في الليمتد بروفايل
نفسن
خربش دقنك
وانت بتهرش
قوم علًق ع الشاى
أو القهوة
خدلك بق ميه
خدلك بق ميه
ومتنساش تلف
الغطا ع القزازة
عكس اتجاه الفتح
بالجامد
اخطف عنب, بطيخ
شخلع موبايلك النوكيا
المعفن
والعب فى التاريخ
واى حد بطل يتصل
بيك من شهر
دلته
فرفت الحشيش
ع التبغ بضمير
ولو حتعزم
زود للزبون التبغ
بغباء
معلش
اللى متعود ع الفقرة
اليتيمة فى حياته
وهو جمهوره
الوحيد
يقدر ميرُحش الشغل
أصلا
****
الكاتب الجميل
الكاتب الجميل
من ديوان العشق السادى _ أشعار بالعامية المصرية
دار ميريت 2009
No comments:
Post a Comment