مكنتش بصدق العيال
اللى لابسين بناطيل جينز
وكاوتش بينور
وبيعاكسو البنات على ناصية الشارع
مكنتش بصدق
البنات اللى حاشيين
سنتيانتهم قطن
يكبروا صدورهم
عشان يسبقوا سنهم
********
مكنتش بصدق
سبارس السجاير
أنها تعمل دماغ
الشلن الفضة
اللى ما بيجبش غير باكو لبان
الحكايات اللى عملها الشاطر حسن
أو حتى الناس الكبار
********
مكنتش بخاف من أمنا الغولة
الضلمة... نونوات القطط بالليل
الكلب اللى بيهوهو
صورة القسيس على الحيطة
عند أم كريستين.....
أنى ااقول لكريستين ...بحبك
تقولى أحنا صغيرين
*******
لكن كان بيخوفنى
أن اصحي الصبح ملاقيش
جنبي امى واخواتى الاتنين
الجذمة البني شرابي الكروهات
مريلة المدرسة أغنية قمرين
اللي سجلتها ع الكاسيت
كراسة الرسم
و
حل مسألة القسمة المطولة
أرقام الحساب
الضرب
*********
No comments:
Post a Comment