دول ناس ميتيين

الناس الميتيين فى قلب المقابر
مش ميتين
انا شفتهم امبارح
فى الشوارع بيتمشوا
عالقهاوى بيشربوا شاى
دا حتى كمان
ابويا جالنا البيت
وستى
وعمتى
قعدوا جنبى ع الكنبة هنا
ما تغيروش خالص
ولسه بيقدروا
ع الضحك

والدردشة
وكمان

امى سخنتلهم العشا


*************

عارف ساعة صلاة الفجر
لقيتهم متجمعين
فى الجامع الكبير

سلمت عليهم كلهم
وقالولى تعالى معانا
حسيت فى كلامهم
عزومة المراكبية
مهو الموت محتاج استعداد
بالنسبالى مش ضربة
فجائية

************

حكولى عن ربنا
تتصور
قالولى
ان فى مغفرة
وكمان سماح
ان انا احتمال اخش الجنة
مش النار
يا سلام عالاستغفار


*********

الناس اللى صاحيين
عالصبح
ومكشرين
اللى ناتفين الحزن
من الكون
ولازقينه
فى وشهم

تصدق
دول ناس ميتيين
ميتتين
من زمان

******************