0
الكحك اللى فى الشهادة
غير كحك العيد
الاول بياخر سنة
والتانى بيجى كل سنة
1
مش ممكن أرجع تانى اعيد
تفاصيل العيد
وأبات وفى حضنى الجزمة بتلمع
والبدلة الجينز
وحبة أحلام للصبح يفتح
ألقى حنان بنت جيرانا
مستنية خروجة لحد المراجيح
ومسكة أيد
وبوسة بريئة
ما بتخدش حيائها
بطعم التفاريح
مش ممكن أرجع تانى اعيد
تفاصيل العيد
ويا عيال حتتنا
نتسابق
على تأجير العجل المتزوق
وكمان فرقعة البومب
حرب العصابات
بمسدس مية
ركوب الحنطور
اللى بيحدف لجنينة بعيد
مش ممكن أرجع تانى اعيد
تفاصيل العيد
وياخدنى اخويا الاكبر منى
لسيما بيجال
ونشوف الفلم العربى
ونرجع عالعصر عشان
الفلم الهندى على التانية
للنجم اميتابتشان
مش ممكن ارجع تانى اعيد
تفاصيل العيد
واستمتع باللمة الحلوة مع العيلة
ونقول حكايات
ووشوش الناس اللى بتضحك
وبتدى عيدية
و اللغبطة اكتر من مرة فى عد الجنيهات
ممكن نرجع تانى نعيد
ونرتب لخروجة انا وانت يا صاحبى
نتمشى عالكورنيش
نتسابق فيها على طلوع الهرم الاكبر
ولحظة مع بعضينا نعيش
وبكاميرتنا
نخلد صورة
يمكن نقدر بيها نعيد
ايام بتعدى وبتروح
ل
ب
ع
ي
د
2 comments:
ممكن نرجع تانى نعيد
ونرتب لخروجة انا وانت يا صاحبى
نتمشى عالكورنيش
نتسابق فيها على طلوع الهرم الاكبر
ولحظة مع بعضينا نعيش
وبكاميرتنا
نخلد صورة
يمكن نقدر بيها نعيد
ايام بتعدى وبتروح
ــــــــــــــ
حاسس انه ممكن جدا
رغم ان الزمن لا يعود بكامل تفاصيله الا ان ده ممكن نعتبره ميزة للأننا بطبيعة الحال نمل التكرار
ــ
مؤثرة كلماتك التى أخذتى بين رحايا الذاكرة
ـــ
فاكر يوم ما روحنا القلعة واتصورنا صور عاندتها الدنيا والكاميرا ماوافقتش اننا نجسد لحظة مش هتتكرر الايام تانى ؟؟
فاكر
كنت عفريت يا واد
:)
Post a Comment